കേരള സർവകലാശാലയുടെ സിൻഡിക്കേറ്റ് യോഗത്തിൽ പങ്കെടുക്കുന്നതിനെച്ചൊല്ലി ഇടത് സിൻഡിക്കേറ്റ് അംഗങ്ങൾക്കിടയിൽ ആശയക്കുഴപ്പം. സിൻഡിക്കേറ്റ് യോഗം വിളിച്ചത് നിയമവിരുദ്ധമാണെന്നാണ് ഇവരുടെ പ്രധാന നിലപാട്. നാളെ നടക്കാനിരിക്കുന്ന നിർണായക യോഗത്തിൽ നിന്ന് വിട്ടുനിൽക്കണമോ അതോ പങ്കെടുക്കണമോ എന്ന കാര്യത്തിൽ ഇതുവരെ അന്തിമ തീരുമാനമെടുത്തിട്ടില്ല.
ഈ യോഗം വിളിച്ചുചേർത്തത് രജിസ്ട്രാർ ഇൻ – ചാർജ്ജ് മിനി കാപ്പനാണ്. കെ എസ് അനിൽകുമാർ സസ്പെൻഷനിലായതിനെ തുടർന്നാണ് മിനി കാപ്പൻ ഈ ചുമതല ഏറ്റെടുത്തത്. എന്നാൽ, ചട്ടവിരുദ്ധമായാണ് മിനി കാപ്പനെ ഈ സ്ഥാനത്ത് നിയമിച്ചതെന്നാണ് ഇടത് അംഗങ്ങൾ പറയുന്നത്. അതിനാൽ മിനി കാപ്പൻ യോഗം വിളിച്ചത് നിയമവിരുദ്ധമാണെന്നും, യോഗത്തിൽ പങ്കെടുത്താൽ ഈ നിയമവിരുദ്ധമായ നടപടിയെ അംഗീകരിക്കുന്നതിന് തുല്യമാകുമെന്നും ഇവർ വിലയിരുത്തുന്നു. മുൻപ് പലതവണ ഇടത് അംഗങ്ങൾ ആവശ്യപ്പെട്ടിട്ടും വൈസ് ചാൻസലർ മോഹനൻ കുന്നുമ്മൽ യോഗം വിളിക്കാൻ തയ്യാറായിരുന്നില്ല. കൂടാതെ, സസ്പെൻഷനിലായ കെ എസ് അനിൽകുമാറിന് യോഗത്തെക്കുറിച്ച് അറിയിപ്പൊന്നും ലഭിച്ചിട്ടുമില്ല.
അതേസമയം, യോഗം ബഹിഷ്കരിച്ചാൽ അത് നിയമപരമായി തിരിച്ചടിയാകുമോ എന്ന ആശങ്കയും ഇടത് അംഗങ്ങൾക്കുണ്ട്. കെ എസ് അനിൽകുമാർ തന്റെ സസ്പെൻഷനെതിരെ ഹൈക്കോടതിയിൽ നൽകിയ ഹർജിയിൽ വിധി വരാനിരിക്കുകയാണ്. ഈ സാഹചര്യത്തിൽ യോഗത്തിൽ പങ്കെടുക്കാതിരിക്കുന്നത് പ്രതികൂലമായി ബാധിച്ചേക്കാം. ഇക്കാര്യത്തിൽ ഒരു തീരുമാനമെടുക്കുന്നതിന് മുൻപ് പാർട്ടി നേതൃത്വവുമായി ചർച്ച നടത്താനാണ് ഇടത് അംഗങ്ങളുടെ തീരുമാനം.