സംസ്ഥാനത്ത് നിപ സമ്പര്ക്കപ്പട്ടികയില് ആകെ 425 പേര് ഉള്ളതായി ആരോഗ്യ. മലപ്പുറത്ത് 228 പേരും പാലക്കാട് 110 പേരും കോഴിക്കോട് 87 പേരുമാണ് സമ്പര്ക്കപ്പട്ടികയിലുള്ളത്. മലപ്പുറത്ത് 12 പേരാണ് ചികിത്സയിലുള്ളത്. അഞ്ചു പേര് ഐ സി യു വിൽ ചികിത്സയിലുണ്ട്. സമ്പര്ക്കപ്പട്ടികയിലുള്ള ഒരാള് നെഗറ്റീവായി. പാലക്കാട് ഒരാള് ഐസൊലേഷനില് ചികിത്സയിലാണ്. പാലക്കാട് 61 ആരോഗ്യ പ്രവര്ത്തകര് സമ്പര്ക്കപ്പട്ടികയിലുണ്ട്. കോഴിക്കോട് ജില്ലയില് സമ്പര്ക്കപ്പട്ടികയിലുള്ള 87 പേരും ആരോഗ്യ പ്രവര്ത്തകരാണ്.
പ്രദേശത്ത് പനി സര്വയലന്സ് നടത്താന് നിര്ദേശം നല്കി. മാനസിക പിന്തുണ ഉറപ്പാക്കണം. പാലക്കാട് സമ്പര്ക്കപ്പട്ടികയിലുള്ളവരെ അവിടെ തന്നെ ഐസൊലേറ്റ് ചെയ്യണം. സാമ്പിളുകള് മാത്രം പരിശോധനയ്ക്ക് അയച്ചാല് മതിയാകും. നിപ സ്ഥിരീകരിച്ച പാലക്കാട്ടേയും മലപ്പുറത്തേയും വ്യക്തികളുടെ റൂട്ട് മാപ് പ്രസിദ്ധീകരിച്ചു. കനിവ് 108 ഉള്പ്പെടെയുള്ള ആംബുലന്സുകളും സജ്ജമാണ്. ഉറവിടം കണ്ടെത്താനുള്ള പ്രവര്ത്തനങ്ങള് ശക്തമാക്കാനും നിര്ദേശം നല്കിയിരിക്കുകയാണ്.
ആരോഗ്യ വകുപ്പു മന്ത്രിയുടെ നേതൃത്വത്തിൽ നടത്തിയ അവലോകന യോഗത്തിൽ ആരോഗ്യ വകുപ്പ് അഡീഷണല് ചീഫ് സെക്രട്ടറി, എന് എച്ച് എം സ്റ്റേറ്റ് മിഷന് ഡയറക്ടര്, ആരോഗ്യ വകുപ്പ് ഡയറക്ടര്, മെഡിക്കല് വിദ്യാഭ്യാസ വകുപ്പ് ഡയറക്ടര്, അഡീഷണല് ഡയറക്ടര്മാര്, ജില്ലാ കളക്ടര്മാര്, ജില്ലാ മെഡിക്കല് ഓഫീസര്മാര്, പൊലീസ് ഉദ്യോഗസ്ഥര്, വിവിധ വകുപ്പ് ഉദ്യോഗസ്ഥര് എന്നിവരും യോഗത്തില് പങ്കെടുത്തു.