പിന്നണി ഗായകൻ അയിരൂർ സദാശിവന്റെ 9-ാം ചരമവാർഷികമാണിന്ന്
പുതു സ്വരങ്ങൾ തേടിയ ദേവരാജൻ മാസ്റ്റർ മലയാളത്തിന് സമ്മാനിച്ച രത്നമായിരുന്നു അയിരുർ സദാശിവൻ . വയലാർ രാമവർമ്മ തന്റെ അമ്മയ്ക്ക് വേണ്ടി എഴുതിയ അമ്മേ അമ്മേ അവിടുത്തെ മുന്നിൽ ഞാനാര് ദൈവമാര്…. എന്ന കവിത തുളുമ്പുന്ന ഗാനം പാടി മലയാള സിനിമ ഗാന രംഗത്തെത്തിയ അയിരൂർ സദാശിവൻ .
ഈ വരികൾ പിന്നീട് ചായം എന്ന ചിത്രത്തിനു വേണ്ടി ദേവരാജൻ ഈണം നൽകിയപ്പോൾ മലയാളിക്ക് ലഭിച്ചത് ഒരു അനുഗ്രഹീത ഗായകനെയാണ്.
അമ്മേ അമ്മേ… ചായം 1973 , ശ്രീവൽസം മാറിൽ ചാർത്തിയ… ചായം 1973 , സിംഫണി സിംഫണി… പഞ്ചവടി 1973 , ഉദയസൗഭാഗ്യ താരക… , കൊച്ചുരാമാ കരിങ്കാലീ… അജ്ഞാതവാസം 1973 , മൊഞ്ചത്തിപ്പെണ്ണേ… മരം 1973 , പ്രാണനാഥ എനിക്കു… ധർമ്മയുദ്ധം 1973 , പാലം കടക്കുവോളം… കലിയുഗം 1973 , ചന്ദനക്കുറി ചാർത്തി… അലകൾ 1974 , ശകുന്തളേ… രാജഹംസം 1974 , കസ്തൂരി ഗന്ധികൾ… സേതുബന്ധനം 1974 , അല്ലിമലർ തത്തേ… ശാപമോക്ഷം 1974 , അങ്കത്തട്ടുകളുയർന്ന നാട്… അങ്കത്തട്ട് 1974 , ഗോപകുമാരാ… രഹസ്യരാത്രി 1974 , തങ്കഭസ്മക്കുറി… രഹസ്യരാത്രി 1974 , ഗാനമധു വീണ്ടും… കല്യാണ സൗഗന്ധികം 1975 ., ഉദയതാരക… മറ്റൊരു സീത 1975 , കാമിനി മൗലിയാം… മറ്റൊരു സീത 1975, ഈശ്വരന്മാർക്കെല്ലാം… ലവ് മാര്യേജ് 1975, ജയജയ ഗോകുല… പാലാഴി മഥനം 1975 , സംഗതിയറിഞ്ഞോ… മുച്ചീട്ടുകളിക്കാരന്റെ മകൾ 1975 , ഭഗവാൻ ഭഗവാൻ… / ജന്മദിനം ജന്മദിനം… കൊട്ടാരം വിൽക്കാനുണ്ട് 1975 , അഹം ബ്രഹ്മാസ്മി… അതിഥി 1975 , ഇതിലെ പോകും കാറ്റിനു പോലും… വിപഞ്ചിക 1984 , ആനന്ദമൂർത്തേ… പമ്പാനദി 1985…. ഉൾപ്പെടെ കുറച്ച് നല്ല ഗാനങ്ങൾ പാടി വ്യത്യസ്തനായി .
1939 ജനുവരി 19ന് പത്തനംതിട്ട ജില്ലയിലെ അയിരൂരിൽ പദ്മനാഭന്റെയും കുഞ്ഞിക്കുട്ടിയുടേയും അഞ്ചു ആൺമക്കളിൽ ഏറ്റവും മൂത്തവനായി
ജനിച്ചു . അച്ഛനും മുത്തച്ഛനും കലാരംഗത്തു പ്രവർത്തിച്ചിരുന്നു . മുത്തച്ഛൻ കൃഷ്ണൻ ആചാരി തിരുവിതാംകൂർ കൊട്ടാരം ചിത്രകാരനും ഭാഗവതരുമായിരുന്നു . ആണ്ടിപ്പിള്ള ഭാഗവതർ , നാഗസ്വരവിദ്വാൻ കുഞ്ചുപ്പണിക്കരാശാൻ , കുട്ടപ്പൻ ഭാഗവതർ , ഹരിപ്പാട് ഗോപി ഭാഗവതർ എന്നിവരിൽ നിന്നുമായിരുന്നു സംഗീതാഭ്യസനം ഗായകൻ കെ.പി. ബ്രഹ്മാനന്ദൻ അടുത്ത സുഹൃത്തായിരുന്നു . സ്കൂൾ ഫൈനൽ പാസായ ശേഷം തിരുവനന്തപുരത്ത് കെ എസ് . കുട്ടപ്പൻ ഭാഗവതരുടെ വീട്ടിൽ താമസിച്ച് സംഗീത പഠനം നടത്തി . 12 വയസ്സ് മുതൽ അമച്വർ നാടകങ്ങളിൽ പാടാൻ തുടങ്ങിയിരുന്നു . തുടർന്ന് എം കെ അർജുനന്റെയൊപ്പം നാടക ഗാനരംഗത്തു പ്രവർത്തിച്ചു .
ഡാൻസർ ചന്ദ്രശേഖരൻ നായരുടെ ഓപ്പറാ ഹൗസിൽ ദക്ഷിണാമൂർത്തി സ്വാമിയുടെ സംഗീത്തിലാണ് സദാശിവൻ പാടി തുടങ്ങിയത് . തുടർന്ന് ചങ്ങനാശേരി ഗീഥയിലും , കെ പി എ സി , കോട്ടയം നാഷണൽ തിയേറ്റേഴ്സ് , ചങ്ങനാശേരി ഗീഥാ , കാളിദാസ കലാകേന്ദ്രം എന്നീ സമിതികളിൽ പാടിയ സദാശിവനെ സിനിമ പിന്നണി ഗാനരംഗത്തേയ്ക്ക് എത്തിക്കുന്നത് ദേവരാജനാണ്. കെ പി എ സി യുമായുള്ള അഭിപ്രായ ഭിന്നതയെ തുടർന്ന് ആലുംമൂടൻ , കോട്ടയം ചെല്ലപ്പൻ , ഖാൻ തുടങ്ങിയവർ കോട്ടയത്ത് നാഷനൽ തിയേറ്റേഴ്സ് എന്ന നാടകട്രൂപ്പ് തുടങ്ങിയപ്പോൾ സദാശിവനും കൂടെച്ചേർന്നു .1973 ൽ മരം എന്ന ചിത്രത്തിൽ ജി ദേവരാജൻ സംഗീതം നൽകിയ മൊഞ്ചത്തിപ്പെണ്ണേ നിൻ ചുണ്ട്…. എന്ന ഗാനം പാടി ഈ രംഗത്തേയ്ക്ക് കടന്നുവന്നു . അജ്ഞാതവാസം , കലിയുഗം , പഞ്ചവടി , കൊട്ടാരം വിൽക്കാനുണ്ട് , രാജഹംസം തുടങ്ങി 25 ലധികം ചിത്രങ്ങളിൽ പാടി . കൂടാതെ നിരവധി ഭക്തിഗാന കാസറ്റുകൾക്കും സംഗീതം നൽകിയിട്ടുണ്ട്.
കേരളത്തിലെ സ്റ്റേജ് കലാകാരന്മാരുടെ സംഘടനയായ സവാക്കിന്റെ വൈസ് പ്രസിഡന്റും ആകാശവാണിയിൽ സംഗീത സംവിധായകനും ഓഡിഷൻ കമ്മറ്റി അംഗവും ആയിരുന്നു . നിരവധി ലളിത ഗാനങ്ങൾക്ക് ഈണം പകർന്നിട്ടുണ്ട് . 1984ൽ നിർമ്മിച്ച ഇനിയും പുറത്തിറങ്ങാത്ത വിപഞ്ചിക എന്ന ചിത്രത്തിനും ഈണം പകർന്നു . 1982 ൽ ചലച്ചിത്രപരിഷത്ത് കമ്മിറ്റി ഏർപ്പെടുത്തിയ വിലക്കാണ് സദാശിവനെ സിനിമയിൽ നിന്ന് തഴയപ്പെടാൻ കാരണമായത് . ബോംബെ മലയാളി അസോസിയേഷൻ നടത്തിയ ഒരു സ്റ്റാർനൈറ്റുമായി ബന്ധപ്പെട്ട് കമ്മിറ്റിയെ ധിക്കരിച്ചു എന്നതാണ് കാരണം. എന്നാൽ വിലക്കിനെ തുടർന്ന് സംഗീതത്തിൽ നിന്ന് പിൻമാറാൻ സദാശിവൻ തയ്യാറായിരുന്നില്ല . സൂപ്പർ മെലഡി എന്ന ഗാനമേള ട്രൂപ്പ് നടത്തി നാടകങ്ങളിലും ഗാനമേളകളിലും കൂടുതൽ സജീവമായി . 2015 ഏപ്രിൽ 9ന് ചങ്ങനാശേരി-ആലപ്പുഴ റോഡിലുണ്ടായ വാഹനാപകടത്തിൽ അന്തരിച്ചു.