പിറന്നാൾ കേക്കിൽ നിന്ന് ഭക്ഷ്യവിഷബാധയേറ്റ് പത്തു വയസ്സുകാരി പട്യാല സ്വദേശി മൻവിക്ക് ദാരുണാന്ത്യം. കഴിഞ്ഞ ഞായറാഴ്ചയാണ് മൻവിയുടെ പിറന്നാൾ ആഘോഷിക്കാൻ കുടുംബം ഓൺലൈനിൽനിന്ന് കേക്ക് വാങ്ങിയത്. കേക്ക് കഴിച്ച എല്ലാവർക്കും രാത്രിയോടെ അസ്വസ്ഥതകൾ അനുഭവപ്പെടാൻ തുടങ്ങി.
തൊണ്ട വരണ്ടെന്ന് പറഞ്ഞു മൻവി ഇടയ്ക്കിടെ വെള്ളം ചോദിച്ചു വാങ്ങി. പിറ്റേദിവസം മൻവിയുടെ ആരോഗ്യനില വഷളായതോടെ ആശുപത്രിയിൽ പ്രവേശിപ്പിക്കുകയായിരുന്നു. വൈകാതെ മരണം സംഭവിച്ചു. ഓൺലൈനിൽ ഓർഡർ ചെയ്ത ചോക്ളേറ്റ് കേക്കിൽ വിഷപദാർഥം അടങ്ങിയിരുന്നുവെന്നും അതാണ് മരണത്തിനു കാരണമായതെന്നും കുടുംബം പറയുന്നു.
സംഭവത്തിൽ പൊലീസ് ബേക്കറി ഉടമയെ പ്രതി ചേർത്ത് എഫ്ഐആർ ഫയൽ ചെയ്തിട്ടുണ്ട്. പോസ്റ്റുമോർട്ടം റിപ്പോർട്ട് ലഭിച്ചിട്ടുണ്ടെന്നും കേക്കിന്റെ സാംപിൾ പരിശോധനയ്ക്ക് അയച്ചിട്ടുണ്ടെന്നും പൊലീസ് വ്യക്തമാക്കി.