രണ്ട് വര്‍ഷത്തെ ഇടവേളയ്ക്ക് ശേഷം കുവൈത്ത് ഫാമിലി വിസ അനുവദിക്കുന്നു. ജനുവരി 28 മുതല്‍ ഫാമിലി വിസ അനുവദിക്കാന്‍ തീരുമാനിച്ചതായി കുവൈത്ത് ആഭ്യന്തര മന്ത്രാലയം അറിയിച്ചു.
പക്ഷെ കുടുംബങ്ങളെ കൊണ്ടുവരുന്ന പ്രവാസിക്ക് കുറഞ്ഞ ശമ്പളം 800 ദിനാര്‍ ആയിരിക്കണം. അതായത്, രണ്ട് ലക്ഷത്തിലധികം രൂപ. ഇത്രയും ഉയര്‍ന്ന ശമ്പളം വാങ്ങുന്നവര്‍ക്ക് മാത്രമാണ് വിസ അനുവദിക്കുക . അപേക്ഷകന്‍ ബിരുദധാരിയാകണം എന്ന നിബന്ധനയുമുണ്ട്. യോഗ്യതയ്ക്ക് അനുസരിച്ചുള്ള ജോലി ചെയ്യുന്ന വ്യക്തിയാകണം. ശമ്പളം കാണിക്കുന്ന സാലറി സര്‍ട്ടിഫിക്കറ്റ് അപേക്ഷ സമയത്ത് സമര്‍പ്പിക്കണം.
സിവില്‍ ഐഡിയുടെ പകര്‍പ്പ്, സത്യവാങ്മൂലം എന്നിവയും അപേക്ഷയോടൊപ്പം വെക്കണം. കുടുംബ വിസയില്‍ എത്തുന്നവര്‍ ആരൊക്കെ, അവരുമായുള്ള ബന്ധം എന്ത് എന്നിവ തെളിയിക്കുന്ന സര്‍ട്ടിഫിക്കറ്റും ആവശ്യമാണ്. ഭാര്യയെ/ഭര്‍ത്താവിനെ കുവൈത്തിലേക്ക് കൊണ്ടുവരാന്‍ ആഗ്രഹിക്കുന്നവര്‍ക്ക് വിവാഹ സര്‍ട്ടിഫിക്കറ്റ് വേണ്ടി വരും. സത്യവാങ്മൂലത്തിനായി എംബസിയെ സമീപിക്കാം. രേഖകള്‍ അറബിയിലാകണം. കുവൈത്ത് വിദേശകാര്യ മന്ത്രാലയം അറ്റസ്റ്റ് ചെയ്യുകയും വേണം.