അധിക്ഷേപ പരാമർശം ഉൾപ്പെടെ സെൻസിറ്റീവ് ഉള്ളടക്കം നിയന്ത്രിക്കുന്ന ജീവനക്കാരെ കൂട്ടത്തോടെ പിരിച്ചുവിട്ട് എക്സ്. ജീവനക്കാരുടെ എണ്ണത്തിൽ എക്സ് 30 ശതമാനം കുറവുവരുത്തിയതായാണ് ഓസ്ട്രേലിയയുടെ ഇ-സേഫ്റ്റി കമ്മിഷന്റെ വിലയിരുത്തൽ. ഇലോൺ മസ്ക് എക്സ് മേധാവിയായി ചുമതലയേറ്റതിനുശേഷം സുരക്ഷ എഞ്ചിനീയർമാരുടെ എണ്ണത്തിൽ 80 ശതമാനം കുറവുണ്ടായതായും ഇ- സേഫ്റ്റി കമ്മിഷൻ്റെ നിരീക്ഷണ വിഭാഗം ചൂണ്ടിക്കാട്ടി. ഓൺലൈൻ ഉള്ളടക്കങ്ങളുടെ സുരക്ഷ ഉറപ്പാക്കാനുള്ള ലോകത്തെ ആദ്യ ഗവണ്മെന്റ് ഏജൻസിയാണ് ഓസ്ട്രേലിയൻ ഇ-സേഫ്റ്റി കമ്മീഷൻ.
എക്സിൽ വിശ്വാസ്യതയും സുരക്ഷയും നിയന്ത്രിക്കുന്ന എഞ്ചിനീയർമാരുടെ എണ്ണം ആഗോളതലത്തിൽ 279 ൽ നിന്ന് 55 ആയി കുറഞ്ഞു. ഇത് 80 ശതമാനം ഇടിവാണ്. ഉള്ളടക്കം നിയന്ത്രിക്കുന്ന മോഡറേറ്റർമാരുടെ എണ്ണം 107-ൽ നിന്ന് 51-ലേക്ക് കുറച്ചു (52%). ഇതുകൂടാതെ കരാർ അടിസ്ഥാനത്തിൽ ജോലി ചെയ്യുന്ന മോഡറേറ്റർമാരുടെ എണ്ണം 2,613ൽ നിന്നും 2,305 (12%) ആയി.