നിരവധി ആരോഗ്യ ഗുണങ്ങള് അടങ്ങിയ ഒരു പച്ചക്കറിയാണ് ബീറ്റ്റൂട്ട്. വിറ്റമിനുകളും നാരുകളും ആന്റി ഓക്സിഡന്റുകളും ധാരാളമായി ഇവയില് അടങ്ങിയിരിക്കുന്നു. വിറ്റാമിന് സി, എ, ബി 6, നാരുകള്, പൊട്ടാസ്യം, മഗ്നീഷ്യം, ഇരുമ്പ്, ഫോളിക്കാസിഡ്, സിങ്ക്, മാംഗനീസ് തുടങ്ങിയവയും ബീറ്റ്റൂട്ടില് അടങ്ങിയിട്ടുണ്ട്.
ദിവസവും ബീറ്റ്റൂട്ട് കഴിക്കുന്നത് കൊണ്ടുള്ള ഗുണങ്ങള് എന്തൊക്കെയാണെന്ന് നോക്കാം…
ഒന്ന്…
പൊട്ടാസ്യം ധാരാളം അടങ്ങിയ ബീറ്റ്റൂട്ട് പതിവായി കഴിക്കുന്നത് രക്തസമ്മര്ദ്ദം നിയന്ത്രിക്കാന് സഹായിക്കും. ഒപ്പം ഹൃദയത്തിന്റെ ആരോഗ്യം സംരക്ഷിക്കാനും ഇവ ഗുണം ചെയ്യും.
രണ്ട്…
പ്രമേഹ രോഗികള്ക്ക് കഴിക്കാവുന്ന ഒരു പച്ചക്കറിയാണ് ബീറ്റ്റൂട്ട്. ബീറ്റ്റൂട്ടിൽ കാർബോഹൈഡ്രേറ്റ് അഥവാ അന്നജം കുറവാണ്. കൂടാതെ ഫൈബറും അടങ്ങിയിട്ടുണ്ട്. അതിനാല് ഇവ രക്തത്തിലെ പഞ്ചസാരയുടെ അളവ് പെട്ടെന്ന് വർധിക്കുന്നത് തടയാന് സഹായിക്കും.
മൂന്ന്…
ഒരു കപ്പ് ബീറ്റ്റൂട്ടില് 3.4 ഗ്രാം ഫൈബര് അടങ്ങിയിട്ടുണ്ട്. അതിനാല് ഇവ ദഹനം മെച്ചപ്പെടുത്താന് ഗുണം ചെയ്യും.
നാല്…
കരളിന്റെ ആരോഗ്യത്തിനും ബീറ്റ്റൂട്ട് കഴിക്കുന്നത് ഗുണം ചെയ്യും. കരളില് കൊഴുപ്പ് അടിഞ്ഞുകൂടുന്നത് തടയുന്നതിനും ഓക്സിഡന്റ് സമ്മര്ദം കുറയ്ക്കുന്നതിനും ബീറ്റ്റൂട്ട് സഹായിക്കും.
അഞ്ച്…
തലച്ചോറിന്റെ ആരോഗ്യത്തിനും ഇവ നല്ലതാണ്. ആന്റി ഓക്സിഡന്റുകള് ധാരാളം അടങ്ങിയ ബീറ്റ്റൂട്ട് പതിവായി കഴിക്കുന്നത് ചില ക്യാന്സറുകളെ തടയാനും സഹായിക്കും.
ആറ്…
അയേണിന്റെ മികച്ച സ്രോതസ്സാണ് ബീറ്റ്റൂട്ട്. അതിനാല് വിളര്ച്ച ഉള്ളവര് ബീറ്റ്റൂട്ട് പതിവായി കഴിക്കുന്നത് ഗുണം ചെയ്യും.
ഏഴ്…
ബീറ്റ്റൂട്ടില് കലോറി വളരെ കുറവാണ്. കൊഴുപ്പും കുറവായതിനാല് ബീറ്റ്റൂട്ട് ജ്യൂസായി കുടിക്കുന്നത് വണ്ണം കുറയ്ക്കാന് സഹായിക്കും. ഇവയില് നാരുകളും ധാരാളമായി അടങ്ങിയിട്ടുണ്ട്.
എട്ട്…
വിറ്റാമിനുകളും മറ്റ് ആന്റി ഓക്സിഡന്റുകളും അടങ്ങിയ ബീറ്റ്റൂട്ട് പതിവായി കഴിക്കുന്നത് ചര്മ്മത്തിന്റെ ആരോഗ്യത്തിന് നല്ലതാണ്.
ശ്രദ്ധിക്കുക: ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയ ശേഷം മാത്രം ആഹാരക്രമത്തില് മാറ്റം വരുത്തുക.