തിരുവനന്തപുരം നെടുമങ്ങാട് ഏണിക്കരയിൽ കെ എസ് ആർ ടി സി ബസും ക്രെയിനും കൂട്ടിയിടിച്ച് അപകടമുണ്ടായി. തിരുവനന്തപുരത്തു നിന്ന് വിതുരയിലേക്ക് പോയ കെ എസ് ആർ ടി സി ബസ് ആണ് അപകടത്തിൽ പെട്ടത്. വഴയില – പഴകുറ്റി നാലുവരി പാത നവീകരണത്തിന്റെ ഭാഗമായി നടക്കുന്ന ജോലികൾക്കിടെ ആണ് ക്രയിനുമായി കെ എസ് ആർ ടി സി ബസ് കൂട്ടിയിടിച്ചത്. വഴയിലക്കും ഏണിക്കരയ്ക്കും ഇടയ്ക്കുള്ള ചെറു വളവിലാണ് അപകടം സംഭവിച്ചത്.
ക്രയിനിന്റെ നീളമുള്ള ഭാഗം മുൻ വശത്തെ കെ എസ് ആർ ടി സി ബസിൻ്റെ ഗ്ലാസ്സിൽ തട്ടുകയായിരുന്നു. അപകടത്തിൽ കെ എസ് ആർ ടി സി ബസ്സിന്റെ ഗ്ലാസ് തകർന്നു, അപകടത്തിൽ ക്രെയിൻ ചെറിയ കുഴിയിലേക്ക് മറിഞ്ഞുവീണു. ബസ് യാത്രക്കാർക്ക് ആർക്കും പരിക്കില്ല. ക്രയിൻ ഡ്രൈവർക്ക് ചെറിയ പരിക്കുണ്ട്. നാലുവരിപ്പാത നിർമ്മാണത്തിന്റെ ഭാഗമായി അശാസ്ത്രീയമായി ക്രമീകരണങ്ങൾ വരുത്തിയത് കാരണം അപകടം നിത്യ സംഭവമാണ്. ഇന്നലെ ഉച്ചയ്ക്ക് 2.45 ഓടെയാണ് സംഭവം. അപകടത്തെ തുടർന്ന് തിരുവനന്തപുരം തെങ്കാശി സംസ്ഥാന പാതയിൽ അരമണിക്കൂർ ഗതാഗതം തടസപ്പെട്ടു.