കേരളത്തിന്റെ എക്കാലത്തേയും സ്വപ്നപദ്ധതിയായ വിഴിഞ്ഞം അന്താരാഷ്ട്ര തുറമുഖം രാജ്യത്തിന് സമര്പ്പിക്കുന്നതിനായി പ്രധാനമന്ത്രി നരേന്ദ്രമോദി ഇന്നലെ രാത്രി തിരുവനന്തപുരത്ത് എത്തി. ഇന്ന് (വെള്ളി) രാവിലെ 11 ന് തുറമുഖത്ത് തയ്യാറാക്കിയ പ്രത്യേകവേദിയില് പൂര്ണതോതില് പ്രവര്ത്തനമാരംഭിച്ച തുറമുഖത്തിന്റെ ഔദ്യോഗിക ഉദ്ഘാടനം പ്രധാനമന്ത്രി നിര്വഹിക്കും.
മുഖ്യമന്ത്രി പിണറായി വിജയന്, കേരള ഗവര്ണര് രാജേന്ദ്ര ആര്ലേക്കര്, കേന്ദ്ര തുറമുഖ വകുപ്പു മന്ത്രി സര്ബാനന്ദ സോനോവാള്, കേന്ദ്രമന്ത്രിമാരായ സുരേഷ് ഗോപി, ജോര്ജ് കുര്യന്, സംസ്ഥാന തുറമുഖ വകുപ്പു മന്ത്രി വി എന് വാസവന്, അദാനി ഗ്രൂപ്പ് ചെയര്മാന് ഗൗതം അദാനി തുടങ്ങിയവര് പങ്കെടുക്കുന്നുണ്ട്.
ഇന്നലെ വൈകീട്ട് 7: 50 ന് തിരുവനന്തപുരം വിമാനത്താവളത്തിലെത്തിയ പ്രധാനമന്ത്രി സ്വീകരണ ശേഷം നേരേ രാജ്ഭവനിലേക്ക് പോയി. രാവിലെ 9.30 ന് രാജ്ഭവനില്നിന്ന് പാങ്ങോട് സൈനികകേന്ദ്രത്തിലേക്കും അവിടെനിന്ന് ഹെലികോപ്റ്ററില് വിഴിഞ്ഞം തുറമുഖത്തും പ്രധാനമന്ത്രി എത്തും എന്നാണ് ഔദ്യോഗികമായി ലഭിച്ചിരിക്കുന്ന അറിയിപ്പ്.