പാർട്ടി സംസ്ഥാന സമ്മേളനത്തോടനുബന്ധിച്ച് കൊല്ലം നഗരത്തിൽ കൊടിയും ഫ്ലക്സും സ്ഥാപിച്ചതിന് സി പി ഐ (എം) ന് കൊല്ലം കോർപ്പറേഷൻ പിഴയിട്ടു. മൂന്നര ലക്ഷം രൂപ പിഴ അടയ്ക്കണമെന്ന് കാണിച്ച് സി പി ഐ (എം) ജില്ലാ സെക്രട്ടറി കൊല്ലായിൽ സുദേവന് കൊല്ലം കോർപറേഷൻ സെക്രട്ടറി നോട്ടീസ് നൽകി. സി പി ഐ (എം) സംസ്ഥാന സമ്മേളനത്തിനായി 20 ഫ്ലക്സ് ബോർഡുകളും 2,500 കൊടികളും നഗരത്തിൻ്റെ വിവിധയിടങ്ങളിൽ കെട്ടിയതിനാണ് പിഴ ചുമത്തിയിരിക്കുന്നത്.
ഫീസ് അടച്ച് നിയമാനുസൃതം ഫ്ലക്സ് സ്ഥാപിക്കാൻ സി പി ഐ (എം) അനുമതി തേടിയിരുന്നു. പാർട്ടി നേതൃത്വം ഇക്കാര്യം കാണിച്ച് കോർപ്പറേഷന് അപേക്ഷ നൽകിയിരുന്നെങ്കിലും കോർപ്പറേഷൻ തീരുമാനമെടുത്തിരുന്നില്ല. കാഴ്ച മറയ്ക്കാതെയും ഗതാഗത തടസ്സമില്ലാതെയും നടപ്പാത കയ്യേറാതെയും ഫ്ലക്സ് ബോർഡുകളും കൊടിയും സ്ഥാപിച്ചെന്നാണ് സി പി ഐ (എം) ജില്ലാ നേതൃത്വം നൽകുന്ന വിശദീകരണം. കൊല്ലം വഴി കണ്ണടച്ച് വരാൻ കഴിയില്ലെന്ന് ഇന്നലെ ഹൈക്കോടതിയും വിമർശിച്ചിരുന്നു.