ഡെൽഹിയിലെ കേരള ഹൗസിൽ മുഖ്യമന്ത്രി പിണറായി വിജയനും ഇ പി ജയരാജനും തമ്മിൽ കൂടിക്കാഴ്ച നടന്നു. മുഖ്യമന്ത്രിയെ കണ്ടിരുന്നോ എന്ന മാധ്യമ ചോദ്യങ്ങൾക്ക് ഇ പി മറുപടിയും നൽകി. കഴിഞ്ഞ ദിവസവും മുഖ്യമന്ത്രിയെ കണ്ടിരുന്നുവെന്നും ഇന്നും കണ്ടെന്നും ഇ പി പ്രതികരിച്ചു. തങ്ങളുടെ മനസിൽ അന്തരിച്ച പ്രിയ സഖാവ് സീതാറാം യെച്ചൂരിയാണെന്നും ഇ പി ജയരാജൻ പറഞ്ഞു.
കഴിഞ്ഞ സി പി എം സെക്രട്ടേറിയറ്റ് യോഗത്തിലാണ് ഇ പി യെ ഇടതു മുന്നണി കൺവീനർ സ്ഥാനത്തു നിന്നു മാറ്റിയത്. ആ യോഗത്തിലും തുടർന്നു നടന്ന സംസ്ഥാന സമിതി യോഗത്തിലും ഇ പി പങ്കെടുത്തിരുന്നില്ല. തുടർന്നു നടന്ന ചടയൻ ഗോവിന്ദൻ അനുസ്മരണ യോഗത്തിലും ഇ പി യുടെ അസാന്നിധ്യം ഉണ്ടായി.
വീട്ടിൽ ആയുർവേദ ചികിത്സയിലാണന്നും നിങ്ങൾക്ക് വീട്ടിൽ പോയാൽ അദ്ദേഹത്തെ കാണാൻ കഴിയുമെന്നും ചടയൻ ഗോവിന്ദൻ അനുസ്മരണത്തിൽ സി പി എം കണ്ണൂർ ജില്ലാ സെക്രട്ടറി എം വി ജയരാജൻ മാധ്യമങ്ങളോട് പറഞ്ഞു.