ലോക്സഭ തിരഞ്ഞെടുപ്പിനുള്ള നാമനിർദ്ദേശ പത്രിക പിൻവലിക്കുന്നതിനുള്ള സമയപരിധി അവസാനിച്ചതോടെ അന്തിമ സ്ഥാനാർഥി പട്ടികയായി . സംസ്ഥാനത്തെ 20 മണ്ഡലങ്ങളിൽ 194 സ്ഥാനാർഥികളാണ് മത്സരിക്കുന്നത് . ഇന്ന് മൂന്നു മണി വരെയായിരുന്നു പിൻവലിക്കുന്നതിനുള്ള സമയപരിധി. സംസ്ഥാനത്ത് 10 സ്ഥാനാർഥികൾ പത്രിക പിൻവലിച്ചു.
കോട്ടയം മണ്ഡലത്തിലാണ് ഏറ്റവുമധികം സ്ഥാനാർഥികളുള്ളത് (14) . ഏറ്റവും കുറവ് സ്ഥാനാർഥികൾ ആലത്തൂരും (5) . കോഴിക്കോട് 13 ഉം , കൊല്ലത്തും കണ്ണൂരും 12 വീതം സ്ഥാനാർഥികളുമുണ്ട്. സംസ്ഥാനത്താകെയുള്ള 194 സ്ഥാനാർഥികളിൽ 25 പേർ സ്ത്രീകളാണ് . പുരുഷന്മാർ 169 . ഏറ്റവുമധികം വനിത സ്ഥാനാർഥികളുള്ളത് വടകര മണ്ഡലത്തിലാണ് . 4 പേർ .തിരുവനന്തപുരം , മാവേലിക്കര , ഇടുക്കി , ചാലക്കുടി , തൃശൂർ , പാലക്കാട് , മലപ്പുറം , വയനാട് , വടകര എന്നിവിടങ്ങളിലാണ് സ്ഥാനാർഥികൾ പത്രിക പിൻവലിച്ചത് . അന്തിമ സ്ഥാനാർഥി പട്ടിക തയ്യാറായതോടെ സ്ഥാനാർഥികൾക്ക് തിരഞ്ഞെടുപ്പ് കമ്മീഷൻ ചിഹ്നങ്ങളും അനുവദിച്ചു .
ലോക്സഭ മണ്ഡലം തിരിച്ച് നിലവിലുള്ള സ്ഥാനാർഥികളുടെ എണ്ണം ചുവടെ :
തിരുവനന്തപുരം 12 (പിൻവലിച്ചത് 1) , ആറ്റിങ്ങൽ 7(0) , കൊല്ലം 12 (0), പത്തനംതിട്ട 8(0), മാവേലിക്കര 9(1) , ആലപ്പുഴ 11(0) , കോട്ടയം 14 (0), ഇടുക്കി 7(1) , എറണാകുളം 10 (0), ചാലക്കുടി 11(1) , തൃശൂർ 9(1), ആലത്തൂർ 5(0), പാലക്കാട് 10(1) , പൊന്നാനി 8(0) , മലപ്പുറം 8 (2) , വയനാട് 9(1), കോഴിക്കോട് 13(0) , വടകര 10(1) , കണ്ണൂർ 12 (0) , കാസർകോട് 9 (0) .