ദില്ലിയില് കുഴല് കിണറില് വീണയാള് മരിച്ചു. 14 മണിക്കൂര് നീണ്ട രക്ഷാദൗത്യത്തിനൊടുവിൽ യുവാവിനെ പുറത്തെടുത്തെങ്കിലും മരിച്ചിരുന്നു. കുഴല് കിണറില് വീണയാളെ മരിച്ച നിലയിലാണ് പുറത്തെടുത്തതെന്ന് ദില്ലി മന്ത്രി അതിഷി മര്ലെന പറഞ്ഞു. 30 വയസ് പ്രായമുള്ള യുവാവ് ആണ് മരിച്ചതെന്നും ഇയാള് എങ്ങനെയാണ് കുഴല് കിണറില് വീണതെന്ന് അന്വേഷിക്കുമെന്നും ദൂരൂഹത സംബന്ധിച്ച് പൊലീസ് അന്വേഷണം നടക്കുമെന്നും മന്ത്രി വ്യക്തമാക്കി. കുഴല് കിണറില് യുവാവ് വീണ സംഭവത്തില് ദുരൂഹത ബാക്കിയാവുകയാണ്. മുറിയിൽ പൂട്ടി സീൽ ചെയ്ത കുഴൽ കിണർ തകർത്താണ് വീണആൾ അകത്തു കടന്നത് എന്നാണ് നേരത്തെ മന്ത്രി വ്യക്തമാക്കിയത്. യുവാവിനെ ആരെങ്കിലും കുഴല് കിണറിനുള്ളില് തള്ളിയിട്ടതാണോയെന്ന സംശയം ഉള്പ്പെടെ മന്ത്രി പ്രകടിപ്പിച്ചിരുന്നു. സംഭവത്തില് ഉത്തരവാദികളായവര്ക്കെതിരെ കര്ശന നടപടിയുണ്ടാകുമെന്നും ദില്ലിയിൽ തുറന്നു കിടക്കുന്ന കുഴൽ കിണറുകൾ 48 മണിക്കൂറിനുള്ളിൽ സീല് ചെയ്യാൻ അടിയന്തിര നിർദേശം നൽകിയെന്നും മന്ത്രി വ്യക്തമാക്കി.
ദില്ലിയിലെ കേശോപുര് മാണ്ഡിക്ക് സമീപമുള്ള ദില്ലി ജല് ബോര്ഡിന്റെ സ്ഥലത്തെ കുഴല് കിണറിലാണ് യുവാവ് വീണത്. ഇന്ന് പുലര്ച്ചെ ഒരു മണിയോടെയാണ് അപകടം നടന്നത് സംബന്ധിച്ച് വികാസ്പുരി പൊലീസ് സ്റ്റേഷനില് വിവരം ലഭിക്കുന്നത്. സംഭവം നടന്ന ഉടനെ അഞ്ച് യൂനിറ്റ് ഫയര്ഫോഴ്സും ദില്ലി പൊലീസുമാണ് ആദ്യം സ്ഥലത്തെത്തിയത്. ഇതിന് പിന്നാലെ എന്ഡിആര്എഫ് സംഘവും സ്ഥലത്തെത്തുകയായിരുന്നു. ഇന്സ്പെക്ടര് ഇന് ചാര്ജ് വീര് പ്രതാപ് സിങിന്റെ നേതൃത്വത്തിലുള്ള എന്ഡിആര്എഫ് സംഘമാണ് രക്ഷാപ്രവര്ത്തനത്തിന് നേതൃത്വം നല്കിയത്. കുഴല് കിണറിന് സമാന്തരമായി മറ്റൊരു കുഴിയെടുത്താശേഷമാണ് യുവാവിനെ പുറത്തെടുത്തത്. എന്നാല്, വൈകിട്ട് മൂന്നോടെ യുവാവിനെ പുറത്തെടുത്തെങ്കിലും മരിച്ച നിലയിലായിരുന്നു. സംഭവത്തില് ദുരൂഹതയുണ്ടെന്നാണ് അധികൃതര് പറയുന്നത്. വീണത് ആരാണെന്ന് ഇതുവരെ തിരിച്ചറിയാനായിട്ടില്ല.