മോഡേണൈസേഷന് ഓഫ് 100 ഫുഡ് സ്ട്രീറ്റ്സ് പദ്ധതിയുടെ ഭാഗമായി കേരളത്തില് 4 നഗരങ്ങളിലെ ഫുഡ് സ്ട്രീറ്റുകള് ആധുനികവത്ക്കരിക്കും. തിരുവനന്തപുരം ശംഖുംമുഖം, ഇടുക്കി മൂന്നാര്, എറണാകുളം കസ്തൂര്ബാ നഗര്, കോഴിക്കോട് ബീച്ച് എന്നിവിടങ്ങളിലാണ് ആദ്യ ഘട്ടത്തില് ഫുഡ് സ്ട്രീറ്റുകള് ആധുനികവത്ക്കരിക്കുന്നത്.
ഈ ഫുഡ് സ്ട്രീറ്റുകളുടെ നവീകരണത്തിനായി ഒരു കോടി രൂപയുടെ വീതം ഭരണാനുമതി നല്കി. കേന്ദ്ര- സംസ്ഥാന ഫണ്ടുകൾ ഉപയോഗിച്ചാണ് പദ്ധതി യാഥാർഥ്യമാക്കുന്നത്. സുരക്ഷിത ഭക്ഷണം ഉറപ്പാക്കാനായി ഭക്ഷ്യ സുരക്ഷാ വകുപ്പ് പ്രധാന നഗരങ്ങളില് ക്ലീന് സ്ട്രീറ്റ് ഫുഡ് ഹബ്ബ് നടപ്പിലാക്കി വരുന്നുണ്ട്. ഇതു കൂടാതെയാണ് ഫുഡ് സ്ട്രീറ്റുകള് ആധുനികവത്കരിക്കുന്നത്.
ഫുഡ് സ്ട്രീറ്റുകളില് നിന്നും ലഭിക്കുന്ന ഭക്ഷണ സുരക്ഷിതത്വവും ശുചിത്വവും ഉറപ്പാക്കുകയാണ് മോഡേണൈസേഷന് ഓഫ് ഫുഡ് സ്ട്രീറ്റ് പദ്ധതിയിലൂടെ ലക്ഷ്യമിടുന്നത്. നിലവില് പ്രവര്ത്തിക്കുന്ന ഫുഡ് സ്ട്രീറ്റുകള് പദ്ധതിയിലൂടെ കൂടുതല് മികവുറ്റതാക്കും. സംസ്ഥാന തനത് ഭക്ഷണങ്ങള് ലഭ്യമാക്കുക വഴി ഫുഡ് ടൂറിസം മേഖലയില്ക്കൂടി പദ്ധതി മുതല്ക്കൂട്ടാകും. ഭക്ഷ്യ സുരക്ഷാ വകുപ്പിന്റെ മേല്നോട്ടത്തില് ജില്ലാ ഭരണകൂടത്തിന്റെയും തദ്ദേശ സ്ഥാപനങ്ങളുടെയും സഹകരണത്തോടെയാണ് പദ്ധതി നടപ്പിലാക്കുന്നത്.
ശംഖുംമുഖത്തുള്ള ഫുഡ് സ്ട്രീറ്റ് നവീകരണത്തിന് നിർമിതി കേന്ദ്രത്തിനാണ് ചുമതല. കസ്തൂര്ബ നഗറില് ജിസിഡിഎ സഹകരണത്തോടെയും മൂന്നാറില് പഞ്ചായത്തിന്റെ സഹകരണത്തോടെയും കോഴിക്കോട് ബീച്ചില് കോര്പ്പറേഷന്റെ സഹകരണത്തോടെയുമാണ് നവീകരണം പൂര്ത്തിയാക്കുന്നത്. രണ്ടു മാസത്തിനുള്ളില് നവീകരണം പൂര്ത്തിയാക്കി ഫുഡ് സ്ട്രീറ്റുകള് തുറക്കാനാണ് ലക്ഷ്യമിടുന്നത്.