മലപ്പുറം ജില്ലയിലെ ബൂത്ത് ലെവല് ഓഫീസര്മാരെ തദ്ദേശ തെരഞ്ഞെടുപ്പ് ജോലിയില് നിന്നും ഒഴിവാക്കിയിട്ടുണ്ടെന്നും ഇതിനകം ഡ്യൂട്ടി ഓര്ഡര് ലഭിച്ചിട്ടുള്ള ബി എല് ഒ മാര് അടിയന്തരമായി ജില്ലാ ഇലക്ഷന് വിഭാഗവുമായി ബന്ധപ്പെടണമെന്നു മലപ്പുറം ജില്ലാ തെരഞ്ഞെടുപ്പ് ഓഫീസര് കൂടിയായ ജില്ലാ കളക്ടര് വി ആര് വിനോദ് അറിയിച്ചു.
മലപ്പുറം ജില്ലയില് 2 ,898 ബൂത്ത് ലെവല് ഓഫീസര്മാരാണുള്ളത്. ഇവരെ തദ്ദേശ തെരഞ്ഞെടുപ്പ് ഡ്യൂട്ടിയിൽ നിന്ന് ഒഴിവാക്കിയിട്ടുണ്ട്. എന്നാൽ തദ്ദേശസ്ഥാപന തെരഞ്ഞെടുപ്പുമായി ബന്ധപ്പെട്ട ഒന്നാംഘട്ട റാന്ഡമൈസേഷന് കഴിഞ്ഞ് പുറത്തിറക്കിയ പോളിങ് ഉദ്യോഗസ്ഥരുടെ പട്ടികയില് ഏതെങ്കിലും ബി എല് ഒ മാര് ഉള്പ്പെടുകയും പോളിങ് ഡ്യൂട്ടി ഉത്തരവ് ലഭിക്കുകയും ചെയ്തിട്ടുണ്ടെങ്കില് അവരെ ഡ്യൂട്ടിയിൽ നിന്ന് ഒഴിവാക്കും. ഇതിനായി ബി എല് ഒ നിയമന രേഖയുടെ പകര്പ്പും പോളിങ് ഡ്യൂട്ടി ഉത്തരവിന്റെ പകര്പ്പും സഹിതം മലപ്പുറം കളക്ടറേറ്റിലെ തെരഞ്ഞെടുപ്പ് വിഭാഗവുമായി അടിയന്തരമായി ബന്ധപ്പെടുകയോ electionmalappuram@gmail.com ല് അറിയിക്കുകയോ ചെയ്യണമെന്നും ജില്ലാ കളക്ടര് അറിയിച്ചു.
നിലവിൽ ഭക്ഷണം കഴിക്കാനോ വിശ്രമിക്കാനോ പോലും സമയം തികയാത്ത ബി എൽ ഒ മാർ ഡ്യൂട്ടി ഓർഡറുമായി ജില്ലാ ഭരണ കേന്ദ്രത്തിൽ അടിയന്തരമായി എത്തണമെന്ന നിർദേശം എത്രത്തോളം പ്രായോഗികമാണെന്ന ചോദ്യവും ഇതിനോടൊപ്പം ചേർത്തു വയ്ക്കേണ്ടിവരും. ബി എൽ ഒ ചുമതലകൾ പൂർത്തിയാക്കിയ ശേഷം ഇക്കാര്യം പരിഗണിക്കാം എന്ന തീരുമാനമാകും ഉചിതം എന്ന അഭിപ്രായവും ബന്ധപ്പെട്ടവരിൽ നിന്നും ഉയരുന്നുണ്ട്.