തിരുവനന്തപുരത്ത് മദ്യലഹരിയിൽ വാഹനങ്ങളെ ഇടിച്ചുതെറിപ്പിച്ച എസ് എച്ച് ഒയെ കസ്റ്റഡിയിലെടുത്തു. വിളപ്പിൽശാല സ്റ്റേഷൻ ഹൗസ് ഓഫീസർ നിജാമിനെയാണ് കസ്റ്റഡിയിലെടുത്തത്. ഇന്നലെ വൈകീട്ട് തിരുവനന്തപുരത്ത് വെച്ചാണ് സംഭവം. കൻറോൺമെൻറ് പൊലീസാണ് എസ് എച്ച് ഒയെ കസ്റ്റഡിയിലെടുത്തത്. നഗരത്തിൽ മഹിളാമോർച്ച പ്രവർത്തകർ വന്ന വാഹനത്തിലാണ് ആദ്യം ഇടിച്ചത്.
തൻ്റെ സ്വകാര്യ വാഹനത്തിലാണ് എസ് എച്ച് ഒ വന്നത്. ഇന്നലെ മുതൽ മെഡിക്കൽ ലീവിലായിരുന്നു എസ് എ ച്ച് ഒ. മഹിളാ മോർച്ച പ്രവർത്തകർ വന്ന വാഹനത്തിൽ ഇടിച്ച സംഭവം പണം കൊടുത്ത് ഒത്തുതീർപ്പാക്കുകയായിരുന്നു. ഇതിനുപിന്നാലെ പി എം ജിയിൽ വെച്ച് വീണ്ടും മറ്റൊരു വാഹനത്തിൽ ഇടിച്ചു. തുടർന്നാണ് കൻറോൺമെൻറ് പൊലീസ് എസ് എച്ച് ഒയെ കസ്റ്റഡിയിലെടുത്തത്. നാട്ടുകാർ കൺട്രോൾ റൂമിൽ അറിയിച്ചത് അനുസരിച്ചാണ് പൊലീസെത്തി പിടികൂടിയത്. സംഭവത്തിൽ പൊലിസ് അന്വേഷണം ആരംഭിച്ചു.