കഴിഞ്ഞ കുറച്ച് ദിവസങ്ങളായി ഹിമാചല്‍ പ്രദേശിലെ മണാലിയില്‍ കനത്ത മഴ പെയ്യുന്നതുമൂലം വിവിധ സ്ഥലങ്ങളില്‍ നിന്ന് കനത്ത നാശനഷ്ടങ്ങള്‍ റിപ്പോര്‍ട്ട് ചെയ്യുന്നുണ്ട്.
ഇന്നു രാവിലെയും മണാലിയില്‍ മഴ മൂലം കനത്ത നാശനഷ്ടങ്ങളുണ്ടായി. ദുന്ധിയിലും അഞ്ജചാനി മഹാദേവിലും ഉണ്ടായ മേഘവിസ്ഫോടനം മൂലം ബിയാസ് നദിയിലുണ്ടായ വെള്ളപ്പൊക്കം മൂലം ടൂറിസ്റ്റ് നഗരമായ മണാലിയിലെ നൂറുകണക്കിന് ഹോട്ടലുകളും മറ്റു കെട്ടിടങ്ങളും അപകടത്തിലാണ്.
ബിയാസ് നദിയില്‍ നാലുവരി പാതയും ഹൈവേയും ഒലിച്ചുപോയി. ഇതുമൂലം മണാലിയിലേക്കുള്ള ഗതാഗതം പൂര്‍ണമായും നിലച്ചു. ആയിരക്കണക്കിന് വിനോദസഞ്ചാരികള്‍ മണാലിയില്‍ കുടുങ്ങിക്കിടക്കുന്നു. വിനോദസഞ്ചാരികള്‍ ഹോട്ടലുകളില്‍ മാത്രം ഒതുങ്ങി, പക്ഷേ നദീതീരത്തുള്ള ഹോട്ടലുകള്‍ ഒഴിപ്പിച്ചു. മണാലിയിലെ ബഹാങ്ങിലുള്ള പ്രശസ്തമായ ഷേര്‍ – ഇ – പഞ്ചാബ് റെസ്റ്റോറന്റ് വെള്ളപ്പൊക്കത്തില്‍ ഒലിച്ചുപോയി. അതിന്റെ ഗേറ്റ് മാത്രമേ അവശേഷിക്കുന്നുള്ളൂ, കെട്ടിടത്തിന്റെ ബാക്കി ഭാഗം ബിയാസില്‍ ഒഴുകിപ്പോയി. ഈ റെസ്റ്റോറന്റിനോട് ചേര്‍ന്നുള്ള നാലു കടകളും ഒലിച്ചുപോയതായാണ് റിപ്പോർട്ട്.
ലാഹൗള്‍ സ്പിതിയിലെ മഞ്ഞുവീഴ്ച കാരണം ചുരങ്ങളിലൂടെയുള്ള ഗതാഗതവും തടസ്സപ്പെട്ടിട്ടുണ്ട്. ഇതുമൂലം നൂറുകണക്കിന് വിനോദസഞ്ചാരികള്‍ ഇവിടെയും കുടുങ്ങിക്കിടക്കുന്നുണ്ട്. ഷിന്‍കുല, ബരാലാച്ച, മറ്റു ചുരങ്ങൾ എന്നിവിടങ്ങളിൽ ഏകദേശം ഒരു അടി മഞ്ഞു വീണു. മണാലിയിലെ വോള്‍വോ ബസ് സ്റ്റാന്‍ഡിനും കേടുപാടുകള്‍ സംഭവിച്ചിട്ടുണ്ട്. വിനോദസഞ്ചാരികളെ കൊണ്ടുപോകുന്ന നൂറുകണക്കിന് ബസുകള്‍ ഇവിടെ നിര്‍ത്തിയിട്ടിരിക്കുകയാണ്. വെള്ളപ്പൊക്ക സാഹചര്യം കണക്കിലെടുത്ത് ചില ബസുകള്‍ റൂട്ടു മാറ്റി. മണാലിയിലെ പച്ചക്കറി മാര്‍ക്കറ്റും വെള്ളത്തിനടിയിലായതായാണ് വിവരം.