താരിഫ് വിഷയത്തിൽ അമേരിക്കയുമായുള്ള ബന്ധത്തിന് വിള്ളൽ വീഴുന്നതിനിടെ പ്രധാനമന്ത്രി നരേന്ദ്രമോദി ഈ മാസം ചൈനയിൽ പോകുന്നതായി റിപ്പോർട്ട്. ആഗസ്റ്റ് 31, സെപ്റ്റംബർ 1 തീയതികളിൽ ചൈനയിൽ നടക്കുന്ന ഷാങ്ഹായി സഹകരണ ഉച്ചകോടിയിൽ പ്രധാനമന്ത്രി പങ്കെടുക്കുമെന്ന് സർക്കാർ വൃത്തങ്ങൾ അറിയിച്ചു.
ഗൽവാൻ സംഘർഷത്തിനു ശേഷം മോദിയുടെ ആദ്യ ചൈന സന്ദർശനമാണിത്. കഴിഞ്ഞ വർഷം ജി 20 ഉച്ചകോടിക്കിടെ നരേന്ദ്ര മോദിയും ഷി ജിൻപിങും കൂടിക്കാഴ്ച നടത്തിയിരുന്നു. രണ്ടു രാജ്യങ്ങളും അതിർത്തിയിൽ സേന പിൻമാറ്റത്തിന് അടക്കം ധാരണയുമുണ്ടാക്കിയിരുന്നു. ബ്രിക്സ് രാജ്യങ്ങളോട് ഡോണൾഡ് ട്രംപ് നിലപാട് കടുപ്പിക്കുമ്പോഴാണ് ചൈനയുമായുള്ള ബന്ധം മെച്ചപ്പെടുത്താൻ മോദിയുടെ നീക്കം എന്നാണ് വിലയിരുത്തൽ.