തിരുവനന്തപുരത്ത് നഗരൂരിൽ സ്കൂൾ ബസ് വയലിലേക്ക് മറിഞ്ഞ് അപകടമുണ്ടായി. വെള്ളല്ലൂർ ഗവൺമെന്റ് എൽ പി സ്കൂളിലെ ബസാണ് അപകടത്തിൽപ്പെട്ടത്. ഇന്നു രാവിലെ ഒമ്പതരയോടെയാണ് അപകടം സംഭവിച്ചത്. കുട്ടികളുമായി പോയ ബസ് റോഡിൽ നിന്നു നിയന്ത്രണം നഷ്ടപ്പെട്ട് വയലിലേക്ക് മറിയുകയായിരുന്നു.
25 കുട്ടികളാണ് ബസിലുണ്ടായിരുന്നത്. അപകടത്തിൽ രണ്ടു കുട്ടികൾക്ക് പരിക്കേറ്റു. ഒരു കുട്ടിയുടെ കെെ ബസിനടിയിൽ കുടുങ്ങി പോയി. 23 കുട്ടികൾക്ക് കാര്യമായ പ്രശ്നങ്ങളില്ല. അപകടം നടന്നതിനു പിന്നാലെ നാട്ടുകാരടക്കം ചേർന്നാണ് ബസിലുണ്ടായിരുന്ന കുട്ടികളെ പുറത്തെത്തിച്ചത്. എല്ലാ കുട്ടികളെയും കേശവപുരം സാമൂഹികാരോഗ്യ കേന്ദ്രത്തിലേക്ക് മാറ്റിയിരിക്കുകയാണ്. ഇവർക്ക് പരിക്കേറ്റിട്ടുണ്ടോയെന്നതടക്കം പരിശോധിച്ച് പ്രാഥമിക ചികിത്സ നൽകി. റോഡിനു വീതികുറഞ്ഞ ഭാഗമാണെന്നും നനവുണ്ടായിരുന്നുവെന്നും നഗരൂർ ഗ്രാമപഞ്ചായത്തംഗം എം രഘു പറഞ്ഞു. മഴ കാരണം റോഡിലെ ചെളിയിൽ വാഹനം തെന്നി നീങ്ങിയതാണ് അപകടകാരണമെന്നും റോഡിലെ പ്രശ്നം പരിഹരിക്കുമെന്നും പഞ്ചായത്തംഗം വ്യക്തമാക്കിയിട്ടുണ്ട്.