*ഒന്നര ലക്ഷത്തിലധികം രൂപയുടെ കോസ്മെറ്റിക് ഉത്പ്പന്നങ്ങള് പിടിച്ചെടുത്തു.
വ്യാജ സൗന്ദര്യ വര്ധക വസ്തുക്കള് വിപണിയിലെത്തുന്നുണ്ടോ എന്ന് പരിശോധിക്കുന്നതിനായുള്ള സംസ്ഥാന ഡ്രഗ്സ് കണ്ട്രോള് വകുപ്പിന്റെ ‘ഓപ്പറേഷന് സൗന്ദര്യ’ മൂന്നാം ഘട്ടം തുടങ്ങി. കഴിഞ്ഞ ദിവസം 101 സ്ഥാപനങ്ങളിൽ പരിശോധന നടത്തിയിരുന്നു. ലിപ്സ്റ്റിക്, ഫേസ് ക്രീം, ബേബി പൗഡര്, ബേബി സോപ്പ്, ബേബി ഓയില് തുടങ്ങിയവയാണ് പ്രധാനമായും പരിശോധന നടത്തിയത്. മതിയായ ലൈസന്സോ മാനദണ്ഡങ്ങളോ പാലിക്കാതെ നിര്മ്മിച്ച് വിതരണം നടത്തിയ 12 സ്ഥാപനങ്ങള്ക്കെതിരെ കേസുമെടുത്തു. ഗുണനിലവാരമില്ലാത്ത ഒന്നര ലക്ഷത്തിലധികം രൂപയുടെ കോസ്മെറ്റിക് ഉത്പ്പന്നങ്ങള് പിടിച്ചെടുത്തിട്ടുമുണ്ട്. 59 സാമ്പിളുകള് ശേഖരിച്ച് ലാബ് പരിശോധനയ്ക്കയച്ചു.
ഓപ്പറേഷന് സൗന്ദര്യയുടെ ഒന്നും രണ്ടും ഘട്ടങ്ങളില് നടത്തിയ പരിശോധനകളില് സൗന്ദര്യ വര്ധക വസ്തുക്കളില് ശരീരത്തിനു ഹാനീകരമാകുന്ന അളവില് രാസവസ്തുക്കള് ചേര്ത്തിട്ടുണ്ടെന്ന് കണ്ടെത്തിയിരുന്നു. ഏകദേശം ഏഴു ലക്ഷത്തിലധികം രൂപ വില വരുന്ന വിവിധ കോസ്മെറ്റിക് ഉത്പ്പന്നങ്ങള് പിടിച്ചെടുക്കുകയും 33 സ്ഥാപനങ്ങള്ക്കെതിരെ കേസെടുക്കുകയും ചെയ്തു. അന്ന് പരിശോധനയ്ക്ക് വിധേയമാക്കിയ ലിപ്സ്റ്റിക്, ഫേസ് ക്രീം സാമ്പിളുകളില് അനുവദനീയമായതില് കൂടുതല് അളവില് മെര്ക്കുറിയുടെ അംശം കണ്ടെത്തിയിരുന്നു. ഇത് മനുഷ്യൻ്റെ ആന്തരികാവയവങ്ങളെ ബാധിക്കുന്ന തരത്തില് ദൂഷ്യഫലങ്ങള് ഉണ്ടാക്കാന് സാധ്യതയുള്ളതാണ്.
സൗന്ദര്യ വര്ധക വസ്തുക്കള് വാങ്ങി ഉപയോഗിക്കുന്നവര് നന്നായി ശ്രദ്ധിക്കേണ്ടതുണ്ട് എന്നാണ് ഈ പരിശോധനകളിൽ നിന്നു വ്യക്തമാകുന്നത്. ഇത്തരം ഉത്പ്പന്നങ്ങള് മതിയായ ലൈസന്സോട് കൂടി നിര്മ്മിച്ചതാണോ എന്നും നിര്മ്മാതാവിന്റെ മേല്വിലാസം വ്യക്തമായി രേഖപ്പെടുത്തിയിട്ടുണ്ടോ എന്നും ലേബല് പരിശോധിച്ച് വാങ്ങേണ്ടതാണ്. എന്തെങ്കിലും പരാതിയുള്ളവര് ഡ്രഗ്സ് കണ്ട്രോള് വകുപ്പിൻ്റെ 18004253182 എന്ന ടോള് ഫ്രീ നമ്പരില് വിവരം അറിയിക്കുക.