ചേലക്കര നിയമസഭാ മണ്ഡലത്തിലെ ഉപതെരഞ്ഞെടുപ്പിന് അന്തിമ സ്ഥാനാര്ത്ഥി പട്ടികയായി. സ്വതന്ത്ര സ്ഥാനാര്ത്ഥി പന്തളം രാജേന്ദ്രന് നാമനിര്ദ്ദേശ പത്രിക പിന്വലിച്ചതോടെ മത്സര രംഗത്ത് ആറുപേരായി. യു ആര് പ്രദീപ് (കമ്മ്യൂണിസ്റ്റ് പാര്ട്ടി ഓഫ് ഇന്ത്യ മാര്ക്സിസ്റ്റ് – ചുറ്റിക അരിവാള് നക്ഷത്രം), കെ ബാലകൃഷ്ണന് ( ഭാരതീയ ജനതാ പാര്ട്ടി – താമര), രമ്യ ഹരിദാസ് (ഇന്ത്യന് നാഷണല് കോണ്ഗ്രസ് – കൈ), കെ ബി ലിന്ഡേഷ് (സ്വതന്ത്രന് – മോതിരം), എന് കെ സുധീര് (സ്വതന്ത്രന് – ഓട്ടോറിക്ഷ), ഹരിദാസന് (സ്വതന്ത്രന് – കുടം) എന്നിവരാണ് സ്ഥാനാര്ത്ഥികള്.
കഴിഞ്ഞ ദിവസം നടന്ന സൂക്ഷ്മ പരിശോധനയില് രണ്ടു പേരുടെ നാമനിര്ദ്ദേശ പത്രിക തള്ളിയിരുന്നു. ഒന്പത് പേരാണ് ചേലക്കര ഉപതെരഞ്ഞെടുപ്പിന് നാമനിര്ദ്ദേശ പത്രിക സമര്പ്പിച്ചിരുന്നത്.