തെരഞ്ഞെടുപ്പ് പെരുമാറ്റ ചട്ടം പിൻവലിച്ചാലുടൻ ഐ റ്റി പാർക്കുകളിൽ മദ്യ വിതരണം തുടങ്ങും. ഇതു സംബന്ധിച്ച നിയമസഭാ സമിതിയുടെ അംഗീകാരം വിതരണത്തിനു ലഭിച്ചിട്ടുണ്ട്. ഇതിനായി നിയമ- എക്സൈസ് വകുപ്പുകൾ സംയുക്ത ചർച്ച നടത്തി പുതിയ ചട്ടങ്ങൾ രൂപീകരിക്കാനാണ് തീരുമാനം. എഫ് എൽ ഫോർ സി എന്ന പുതിയ ലൈസൻസ് നൽകിയാവും ഐ റ്റി പാർക്കുകളിൽ മദ്യം വിതരണം ചെയ്യുക. ഈ ലൈസൻസിന് 20 ലക്ഷമാണ് ഫീസ് ഈടാക്കുക.
ഐ റ്റി പാർക്കുകളിൽ പുതുതായി പ്രവർത്തനം തുടങ്ങുന്ന മദ്യ വിതരണ ശാലകൾ രാവിലെ 11 മുതൽ രാത്രി 11 വരെയാവും പ്രവർത്തിക്കുക. പാർക്കിന് നേരിട്ടോ അല്ലെങ്കിൽ പ്രമോട്ടർ പറയുന്ന കമ്പനിക്കോ വിതരണത്തിൻ്റെ നടത്തിപ്പ് അവകാശം നൽകും.
പ്രതിപക്ഷം സർക്കാരിൻ്റെ ഈ തീരുമാനത്തിനെതിരെ രംഗത്തു വന്നിട്ടുണ്ട്. നിലവിലെ ബാർ ലൈസൻസികളിലേക്കു തന്നെ ഇതിൻ്റെ നടത്തിപ്പും പോകാൻ സാധ്യതയുണ്ടെന്നാണ് പ്രതിപക്ഷ വിമർശനം. മാത്രമല്ല, നല്ല മിടുക്കുള്ള ഐ റ്റി പ്രൊഫഷണലുകൾക്കിടയിൽ ഉപഭോഗം വർധിക്കുമെന്നും അവരുടെ സർഗശേഷിയെ അത് ബാധിക്കുമെന്നും പ്രതിപക്ഷം കുറ്റപ്പെടുത്തുന്നു