10ാം ക്ലാസ് പരീക്ഷാഫലം വന്നതോടെ വിദ്യാർത്ഥികളും രക്ഷകർത്താക്കളും ഇനി പതിനൊന്നാം ക്ലാസിലെ പ്രവേശനത്തെപ്പറ്റിയാകും ചിന്തിക്കുക . പതിവു പോലെ സയൻസ് വിഷയങ്ങൾക്കു തന്നെയാകും എല്ലാവരും ഇപ്പോഴും മുൻഗണന നൽകുക . വിഷയം ഏതായാലും പ്ലസ് വൺ ക്ലാസിലേക്കുള്ള പ്രവേശന നടപടികൾ എങ്ങനെ ? എപ്പോൾ ? എന്നൊക്കെ ശ്രദ്ധിക്കുന്നത് നല്ലതാണ്.
തീയതികൾ ഇങ്ങനെ
പ്ലസ് വൺ പ്രവേശനത്തിനുള്ള അപേക്ഷകൾ ഈ മാസം 16 മുതൽ (മെയ് 16 ) ഓൺലൈനായി സമർപ്പിക്കാം. ഓൺലൈനായി സമർപ്പിക്കാവുന്ന അവസാന തീയതി മെയ് 25 .പ്ലസ് വൺ ക്ലാസുകൾ ജൂൺ 24 ന് ആരംഭിക്കും.
സിംഗിൾ വിൻഡോ ഷെഡ്യൂൾ
- ട്രയൽ അലോട്മെൻ്റ് – മെയ് 29 ന്
- ആദ്യ അലോട്മെൻ്റ് – ജൂൺ 5ന്
- രണ്ടാം അലോട്മെൻ്റ് – ജൂൺ 12ന്
- മൂന്നാം അലോട്മെൻ്റ് – ജൂൺ 19 ന്
കാതലായ ചില മാറ്റങ്ങൾ
റാങ്ക് ലിസ്റ്റിൽ ആദ്യ പരിഗണന അക്കാദമിക മികവിനായിരിക്കും . വെയിറ്റഡ് ഗ്രേഡ് പോയിൻ്റ് ആവറേജ് ഒരേ പോലെ വരുന്ന സാഹചര്യത്തിൽ ഗ്രേഡ് മാർക്കല്ലാതെ അക്കാദമിക മികവ് മുഖ്യ പരിഗണയാകും എന്ന് സാരം.
സംസ്ഥാനത്ത് എസ് റ്റി വകുപ്പിനു കീഴിൽ 14 എം ആർ എസ് (ഹയർ സെക്കൻ്ററി) കളുണ്ട് . ഏകജാലക സംവിധാനത്തിലൂടെയാകും ഈ വർഷം മുതൽ ഇവിടെ പ്രവേശനം നടത്തുക.
ഏഴു ജില്ലകളിലെ (കാസർഗോഡ് , കണ്ണൂർ , വയനാട് , കോഴിക്കോട് , മലപ്പുറം , പാലക്കാട് , തിരുവനന്തപുരം) സർക്കാർ സ്കൂളുകളിലെല്ലാം മുപ്പത് ശതമാനം കൂടി സീറ്റ് വർധിപ്പിക്കും . ഈ ജില്ലകളിലെ എയ്ഡഡ് സ്കൂളുകളിൽ ഇരുപത് ശതമാനം സീറ്റ് വർധിപ്പിക്കും . എയ്ഡഡ് സ്കൂളുകളിൽ വീണ്ടും ആവശ്യമുണ് എന്ന് കണ്ടാൽ മാർജിനൽ സീറ്റ് വർധനവായി പത്തു ശതമാനം കൂടി നൽകും.
കൊല്ലം , എറണാകുളം , തൃശൂർ ജില്ലകളിലെ മുഴുവൻ സർക്കാർ – എയ്ഡഡ് ഹയർ സെക്കൻ്ററി സ്കൂളുകളിലും ഇരുപത് ശതമാനം മാർജിനൽ സീറ്റും വർധിപ്പിച്ചിട്ടുണ്ട്.