ഏപ്രിൽ 25 മുതൽ 27 വരെ പാലക്കാട് ജില്ലയിലെ വിവിധ പ്രദേശങ്ങളിൽ ഉഷ്ണതരംഗ സാഹചര്യം നിലനിൽക്കുമെന്ന് കേന്ദ്ര കാലാവസ്ഥ വകുപ്പ് അറിയിച്ചു. തുടർച്ചയായ ദിവസങ്ങളിൽ അതിതീവ്രമായ ചൂട് രേഖപ്പെടുത്തിയതിന്റേയും അടുത്ത ദിവസങ്ങളിലും 41 ഡിഗ്രി സെൽഷ്യസ് വരെ താപനില ഉയരുമെന്ന പ്രവചനത്തിന്റെയും അടിസ്ഥാനത്തിലാണ് ഉഷ്ണതരംഗ മുന്നറിയിപ്പ്. മറ്റ് ജില്ലകളിലും കനത്ത ചൂടാണ് ഇന്ന് കാലാവസ്ഥാ നിരീക്ഷണ കേന്ദ്രം പ്രവചിച്ചിരിക്കുന്നത്. ഈ സാഹചര്യത്തില് പോളിംഗ് ബൂത്തിലേക്ക് വരുന്നവര് ജാഗ്രത പുലർത്തുക.
ഉഷ്ണതരംഗം അതീവ ജാഗ്രത വേണ്ട സാഹചര്യമാണ്. പൊതുജനങ്ങളും ഭരണ – ഭരണേതര സംവിധാനങ്ങളും വേണ്ട ജാഗ്രത പാലിക്കണം. സൂര്യാഘാതവും സൂര്യാതപവും ഏൽക്കാൻ സാധ്യത കൂടുതലാണ്. സൂര്യാഘാതം മരണത്തിലേക്ക് വരെ നയിച്ചേക്കാം. തൊപ്പി, കുട കയ്യില് കരുതുക. ഇളംനിറത്തിലുള്ള കോട്ടന് വസ്ത്രങ്ങള് ധരിക്കുക. ധാരാളം വെള്ളം കുടിക്കുക. വോട്ട് രേഖപ്പെടുത്താനായി വരിയില് നില്ക്കുമ്പോള് വെയില് നേരിട്ട് ശരീരത്തില് ഏല്ക്കാതിരിക്കാന് ശ്രദ്ധിക്കുക. കുട്ടികളെ പോളിംഗ് ബൂത്തിലേക്ക് കൊണ്ടുപോകുന്നത് പരമാവധി ഒഴിവാക്കുക. ശാരീരിക ബുദ്ധിമുട്ട് അനുഭവപ്പെട്ടാല് ഉടന് ആരോഗ്യകേന്ദ്രവുമായി ബന്ധപ്പെടുക