ഇറാനിലെയും ഇസ്രയേലിലെയും സംഘര്ഷാവസ്ഥ കണക്കിലെടുത്ത് ഇരു രാജ്യങ്ങളിലേക്കും യാത്ര ചെയ്യരുതെന്ന് ഇന്ത്യൻ പൗരന്മാര്ക്ക് മുന്നറിയിപ്പുമായി കേന്ദ്ര സര്ക്കാര്. വെള്ളിയാഴ്ചയാണ് വിദേശകാര്യ മന്ത്രാലയം നിർദേശം പുറത്തുവിട്ടത്. സിറിയയിലെ ഇറാന് എംബസിക്കു നേരെ ഇസ്രയേല് നടത്തിയ വ്യോമാക്രമണത്തില് മുതിര്ന്ന ഇറാനിയന് സൈനിക ഉദ്യോഗസ്ഥര് കൊല്ലപ്പെട്ടതോടെയാണ് സംഘര്ഷം രൂക്ഷമായത്. ഇസ്രയേലിനും സഖ്യരാജ്യങ്ങളുടെ സൈനിക സംവിധാനങ്ങള്ക്കും നേരെ ഇറാന്റെ തിരിച്ചടി ഉണ്ടാകുമെന്ന് യുഎസ് രഹസ്യാന്വേഷണ ഏജന്സികള് മുന്നറിയിപ്പു നല്കിയിരുന്നു.