സംസ്ഥാനത്ത് ഇന്ന് ഒമ്പതു ജില്ലകളില് ഉയര്ന്ന താപനില മുന്നറിയിപ്പ്. ജാഗ്രതയുടെ ഭാഗമായി ഈ ജില്ലകളില് കേന്ദ്ര കാലാവസ്ഥ വകുപ്പ് യെല്ലോ അലേര്ട്ട് പ്രഖ്യാപിച്ചിട്ടുണ്ട്.പാലക്കാട്, കൊല്ലം ജില്ലകളില് ഉയര്ന്ന താപനില 38°C വരെയും തിരുവനന്തപുരം, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂര്, കോഴിക്കോട് ജില്ലകളില് 36°C വരെയും (സാധാരണയെക്കാള് 2- 4 °C കൂടുതല്) രേഖപ്പെടുത്താന് സാധ്യതയെന്നും അറിയിപ്പിൽ പറയുന്നു.
ഉയര്ന്ന താപനിലയും ഈര്പ്പമുള്ള വായുവും മൂലം ഈ ജില്ലകളില്, മലയോര മേഖലകളിലൊഴികെ 15 മുതല് 18 വരെ ഡിഗ്രി ചൂടും അസ്വസ്ഥതയുണ്ടാക്കുന്ന കാലാവസ്ഥയ്ക്ക് സാധ്യതയുണ്ടെന്നും മുന്നറിയിപ്പില് പറയുന്നു.കൂടാതെ തിരുവനന്തപുരം, കൊല്ലം, പത്തനംതിട്ട ജില്ലകളില് നേരിയ മഴയ്ക്ക് സാധ്യതയുണ്ടെന്നും മുന്നറിയിപ്പില് സൂചനയുണ്ട്.