കേരള സർവ്വകലാശാല യൂണിയൻ പിരിച്ചുവിടാൻ വി.സി ഉത്തരവ്. സർവകലാശാല കലോത്സവവുമായി ബന്ധപ്പെട്ട വിവാദങ്ങളുടെ തുടർച്ചയാണ് ഇപ്പോഴത്തെ നടപടി. കാലാവധി കഴിഞ്ഞിട്ടും അത് മറച്ചുവെച്ച് കലോത്സവം നടത്തിയെന്ന് കണ്ടെത്തിയതിനെ തുടർന്നാണ് യൂണിയൻ പിരിച്ചുവിടാൻ വി.സി ഉത്തരവ് നൽകിയത്. ഫെബ്രുവരി 26-ന് കാലാവധി അവസാനിച്ച യൂണിവേഴ്സിറ്റി യൂണിയൻ ഭാരവാഹികൾക്ക് പുതിയ തിരഞ്ഞെടുപ്പ് നടക്കുന്നതുവരെ കാലാവധി നീട്ടി കൊടുക്കണമെന്ന നിലവിലെ യൂണിയൻ്റെ നിർദേശവും വി.സി തള്ളി.
പുതിയ ജനറൽ കൗൺസിൽ ചേർന്ന് തെരഞ്ഞെടുപ്പ് നടത്താനും, ഈ കാലയളവിൽ യൂണിയൻ്റെ ചുമതല സ്റ്റുഡൻസ് സർവീസ് ഡയറക്‌ടർക്ക് നൽകാനും വി.സിയുടെ ഉത്തരവിൽ പറയുന്നു. യുവജനോത്സവത്തിന്റെ വിധികർത്താവായിരുന്ന പി. എൻ. ഷാജിയുടെ ആത്മഹത്യയ്ക്ക് വഴിവച്ച സാഹചര്യവും മത്സവേദിയിൽ ഉയർന്നുവന്ന കോഴ ആരോപണവും അന്വേഷിക്കാൻ കേരള പോലീസിന് കത്തുനൽകാൻ വി സി രജിസ്ട്രാർക്ക് നിർദേശം നൽകി.