പ്രശസ്ത ചലച്ചിത്ര നിര്‍മ്മാതാവും സംവിധായകനുമായ രാം ഗോപാല്‍ വര്‍മയും രാഷ്ട്രീയത്തിലേക്ക്. ലോക്സഭാ തെരഞ്ഞെടുപ്പില്‍ ആന്ധ്രാപ്രദേശിലെ പിത്താപുരം മണ്ഡലത്തില്‍ നിന്ന് മത്സരിക്കുമെന്ന് അദ്ദേഹം എക്സ് പോസ്റ്റില്‍ അറിയിച്ചു.
തെലുങ്ക് നടനും ജെ എസ് പി നേതാവുമായ പവന്‍ കല്യാണിനെ പിത്തപുരത്ത് മത്സരിപ്പിക്കുമെന്ന് ടി ഡി പി-ബി ജെ പി -ജെ എസ് പി സഖ്യം പ്രഖ്യാപിച്ചതിനു പിന്നാലെയാണ് രാം ഗോപാല്‍ വര്‍മയുടെയും പ്രഖ്യാപനം. തീരുമാനം പെട്ടെന്നുണ്ടായതാണെന്നും പിത്താപുരത്ത് മത്സരിക്കുന്ന വിവരം സന്തോഷത്തോടെ അറിയിക്കുന്നുവെന്നും രാംഗോപാല്‍ വര്‍മ പറയുന്നു.
അതേസമയം, പാര്‍ട്ടിയെ കുറിച്ചും മുന്നണിയെ കുറിച്ചുമൊന്നും അദ്ദേഹം വെളിപ്പെടുത്തിയിട്ടില്ല. ‘പെട്ടെന്നുള്ള തീരുമാനം. ഞാന്‍ പിത്താപുരത്ത് മത്സരിക്കുന്നു എന്ന് അറിയിക്കുന്നതില്‍ സന്തോഷമുണ്ട്’ എന്നു മാത്രമാണ് രാം ഗോപാല്‍ വര്‍മ ട്വീറ്റ് ചെയ്തത്.
ആന്ധ്രാപ്രദേശിലെ രാഷ്ട്രീയം പ്രമേയമാക്കി കഴിഞ്ഞ വര്‍ഷം പുറത്തിറങ്ങിയ രാം ഗോപാല്‍ വര്‍മ യുടെ വ്യൂഹം എന്ന സിനിമ വിവാദങ്ങള്‍ ഉണ്ടാക്കിയിരുന്നു. റിലീസിനു പിന്നാലെ രാം ഗോപാലിനെ സംസ്ഥാനത്ത് നിന്നു പുറത്താക്കണമെന്ന് നിരവധി പ്രാദേശിക നേതാക്കള്‍ ആവശ്യപ്പെടുകയും ചെയ്തു.
ആന്ധ്രാപ്രദേശ് മുന്‍ മുഖ്യമന്ത്രി വൈ എസ് രാജശേഖര റെഡ്ഡിയുടെ മരണവുമായി ബന്ധപ്പെട്ട സംഭവങ്ങളായിരുന്നു സിനിമയുടെ പ്രമേയം. മാനസ രാധാകൃഷ്ണനും അജ്മല്‍ അമീറും സുരഭി പ്രഭാവതിയും പ്രധാന വേഷങ്ങളിലെത്തിയ ചിത്രത്തിന്റെ റിലീസിനു പിന്നാലെ തന്നെ അന്ന് വിവാദവുമുണ്ടായിരുന്നു.