മദ്യലഹരിയിൽ ജോലിക്കെത്തിയ കണ്ടക്ടറെ ഡ്രൈവർ വണ്ടിയിൽ നിന്നിറക്കിവിട്ടു. യാത്രക്കാർ പരാതിയുമായി എത്തിയതോടെയാണ് കണ്ടക്ടറെ ഡ്രൈവർ പാതിവഴിയിൽ ഇറക്കിവിട്ടത്. കഴിഞ്ഞ ദിവസം കുന്നംകുളത്തു നിന്ന് വൈകിട്ട് തൃശൂരിലേക്ക് പോയ സ്വകാര്യ ബസിലാണ് സംഭവം.
മദ്യപിച്ച് ജോലിക്കു കയറിയ കണ്ടക്ടറെ യാത്രക്കാർ കയ്യോടെ പിടികൂടുകയായിരുന്നു. തുടര്‍ന്ന് യാത്രക്കാര്‍ ഡ്രൈവറോട് പരാതി പറഞ്ഞു. ബസ് മഴുവഞ്ചേരിയിലെത്തിയപ്പോള്‍ കണ്ടക്ടറുടെ ശല്യം സഹിക്കാതെ യാത്രക്കാര്‍ ബഹളമുണ്ടാക്കി. ഇതോടെ ബസ് നിർത്തി കണ്ടക്ടറെ, ഡ്രൈവർ ഇറക്കിവിടുകയായിരുന്നു. യാത്രക്കാരെ മറ്റ് ബസുകളില്‍ കയറ്റി വിട്ട ശേഷം സര്‍വീസ് റദ്ദാക്കി ബസ് കുന്നംകുളത്തേക്ക് തിരികെ മടങ്ങി.