മധ്യപ്രദേശിലെ ധാര് ജില്ലയില് നടത്തിയ പരിശോധനയിൽ 92 ഇടങ്ങളില് നിന്നായി ദിനോസറുകളുടെ വാസസ്ഥലത്തിന്റെയും 256 മുട്ടകളുടെയും ഫോസിലുകള് കണ്ടെത്തി ശാസ്ത്രജ്ഞർ. മുട്ടയുടെ ശേഷിപ്പുകള് കണ്ടെത്തിയ സ്ഥലങ്ങളില് ഒന്ന് മുതല് 20 മുട്ടകള് വരെയെന്ന കണക്കില് ഉണ്ടായിരുന്നുവെന്നും ഗവേഷകര് വെളിപ്പെടുത്തി.
66 ദശലക്ഷം (6.6 കോടി)വര്ഷങ്ങള് ഈ ഫോസിലുകള്ക്ക് പഴക്കമുണ്ടെന്നാണ് ശാസ്ത്രജ്ഞര് പറയുന്നത്. ഓരോ മുട്ടയ്ക്കും 15 മുതല് 17 സെന്റീമീറ്റര് വരെ വ്യാസമുണ്ട്. ഓരോ കൂട്ടിലും 20 മുട്ടവരെയും ദിനോസറുകള് സൂക്ഷിച്ചിരുന്നു.ദിനോസറുകള് ലോകത്തില് നിന്ന് വംശനാശം സംഭവിക്കുന്നതിന് മുന്പ്, പരിണാമത്തിലെ അവസാനദശയില് ഇന്ത്യയിലുണ്ടായിരുന്നുവെന്നാണ് ശാസ്ത്രലോകത്തിന്റെ നിഗമനം.