ഉപഭോക്താക്കളുടെ സൗകര്യാര്ഥം പുതിയ ഫീച്ചറുകള് തുടര്ച്ചയായി അവതരിപ്പിച്ച് വരികയാണ് വാട്സ്ആപ്പ്. കമ്മ്യൂണിറ്റി ഗ്രൂപ്പ് ചാറ്റില് ഇവന്റുകളും പരിപാടികളും പിന് ചെയ്ത് വെയ്ക്കാന് കഴിയുന്ന സെക്ഷന് അവതരിപ്പിക്കാനുള്ള ഒരുക്കത്തിലാണ് വാട്സ്ആപ്പ്.ആപ്പിന്റെ പുതിയ അപ്ഡേറ്റായി ഇത് അവതരിപ്പിക്കാനാണ് ഉദ്ദേശിക്കുന്നത്. വരാനിരിക്കുന്ന ഇവന്റുകള് ഓട്ടോമാറ്റിക്കായി പിന് ചെയ്തു വെയ്ക്കുന്ന തരത്തിലാണ് ഫീച്ചര് ക്രമീകരിച്ചിരിക്കുന്നത്. കമ്മ്യൂണിറ്റി ഇന്ഫോ സ്ക്രീനില് മുകളിലായാണ് ഇത് തെളിയുക.
ഏത് സമയത്തും കമ്മ്യൂണിറ്റി മെമ്പര് ക്രിയേറ്റ് ചെയ്യുന്ന പുതിയ ഇവന്റുകള് ഓട്ടോ മാറ്റിക്കായി പുതിയ സെക്ഷനില് വരുന്ന തരത്തിലാണ് ക്രമീകരണം. പുതിയ ഇവന്റുകളെ കുറിച്ച് മറ്റു മെമ്പര്മാര്ക്ക് എളുപ്പം അറിയാന് സാധിക്കുന്നവിധമാണ് ക്രമീകരണം. മെമ്പര്മാര് മറന്നുപോകുന്ന സാഹചര്യം ഒഴിവാക്കാന് ലക്ഷ്യമിട്ടാണ് ഈ ഫീച്ചര്. നിലവില് ഇവന്റുകള് നടക്കുന്ന സമയം അറിയണമെങ്കില് കമ്മ്യൂണിറ്റി ഗ്രൂപ്പ് ചാറ്റില് സെര്ച്ച് ചെയ്യണം. എന്നാല് പുതിയ സെക്ഷന് വരുന്നതോടെ ഈ ബുദ്ധിമുട്ട് ഒഴിവാകും. ഷെഡ്യൂള് ചെയ്ത ഇവന്റുകള് അടക്കം പിന് ചെയ്ത് വെയ്ക്കാന് കഴിയുന്ന തരത്തിലാണ് പുതിയ ഫീച്ചര്.
ഭാവിയില് തേര്ഡ് പാര്ട്ടി ചാറ്റുകളില് നിന്നുള്ള സന്ദേശങ്ങളും വാട്സ്ആപ്പ് വഴി സ്വീകരിക്കാന് കഴിയും! കേള്ക്കുമ്പോള് ഒരു അമ്പരപ്പ് തോന്നാം. ഈ സേവനം നല്കുന്ന ഫീച്ചര് വാട്സ് ആപ്പ് വികസിപ്പിച്ച് വരുന്നതായാണ് റിപ്പോര്ട്ട്.
ടെലിഗ്രാം, സിഗ്നല് പോലെ വ്യത്യസ്ത മെസേജിങ് ആപ്പുകള് ഉപയോഗിച്ചും വാട്സ്ആപ്പ് ഉപയോക്താക്കളുമായി ആശയവിനിമയം നടത്താന് കഴിയുന്നതാണ് പുതിയ ഫീച്ചര്. അതായത് വാട്സ്ആപ്പ് അക്കൗണ്ട് ഇല്ലാതെ തന്നെ മറ്റൊരു മെസേജിങ് ആപ്പ് ഉപയോഗിച്ച് വാട്സ്ആപ്പ് ഉപയോക്താവുമായി ആശയവിനിമയം നടത്താനുള്ള സൗകര്യമാണ് വരാന് പോകുന്നത്. ഇതിനായി ചാറ്റ് ഇന്റര്ഓപ്പറബിലിറ്റി ഫീച്ചര് വികസിപ്പിക്കുന്ന തിരക്കിലാണ് വാട്സ്ആപ്പ്. യൂറോപ്യന് യൂണിയന്റെ വ്യവസ്ഥകള് അനുസരിച്ചാണ് പുതിയ ഫീച്ചര് ഒരുക്കുന്നത്.
ഐഒഎസ് ബീറ്റാ വേര്ഷനില് തേര്ഡ് പാര്ട്ടി ചാറ്റ്സ് എന്ന പേരില് പുതിയ ഫീച്ചര് അവതരിപ്പിച്ചതായി റിപ്പോര്ട്ടുകളുണ്ട്. മാനുവല് ആയി ചാറ്റ് ഇന്റര്ഓപ്പറബിലിറ്റി ഫീച്ചര് എനേബിള് ചെയ്യാന് കഴിയുന്ന തരത്തിലാണ് പുതിയ ഫീച്ചര് കൊണ്ടുവരിക.