നടന് ജോജു ജോര്ജ് സംവിധാനം ചെയ്യുന്ന ‘പണി’ എന്ന ചിത്രത്തിന്റെ ക്യാമറമാന് സ്ഥാനത്തു നിന്നും പ്രമുഖ ഛായഗ്രാഹകന് വേണുവിനെ മാറ്റി. തൃശ്ശൂരില് ഒരു മാസം നടന്ന ഷൂട്ടിംഗിന് ശേഷമാണ് വേണുവിനെ മാറ്റി ‘ഇരട്ട’ എന്ന ചിത്രത്തിന്റെ ക്യാമറമാന് വിജയിനെ കൊണ്ടുവന്നതെന്നാണ് റിപ്പോർട്ട്. ചിത്രത്തില് പ്രവര്ത്തിക്കുന്നവരോട് മോശമായി പെരുമാറിയതാണ് വേണുവിനെ മാറ്റാന് കാരണമെന്നാണ് റിപ്പോര്ട്ടുകൾ.
കഴിഞ്ഞ ദിവസം ചിത്രത്തിന്റെ നിര്മ്മാതാവ് കൂടിയായ ജോജുവുമായി വേണു തൃശ്ശൂര് പൊലീസ് ട്രെയിനിംഗ് കോളേജിലെ ചിത്രീകരണത്തിനിടെ വഴക്കുണ്ടാകുകയും തുടർന്ന് കയ്യാങ്കളിയിലേക്ക് നീങ്ങുകയും ചെയ്തിരുന്നു. തുടര്ന്നാണ് വേണുവിനെ ചിത്രത്തില് നിന്നും ഒഴിവാക്കാന് ജോജു തീരുമാനിച്ചത്. തനിക്കു മാത്രമല്ല, മറ്റുള്ളവര്ക്കു കൂടി പ്രശ്നം സൃഷ്ടിക്കുന്നതുകൊണ്ടാണ് വേണുവിനെ മാറ്റിയതെന്നാണ് ജോജു പറയുന്നത്.
അതേ സമയം തൃശ്ശൂരില് ഹോട്ടലില് താമസിക്കുന്ന തന്നെ ചില ഗുണ്ടകള് ഭീഷണിപ്പെടുത്തിയതായി വേണു പൊലീസില് പരാതി നല്കിയിട്ടുണ്ട്. വെള്ളിയാഴ്ച തൃശ്ശൂര് ഈസ്റ്റ് പൊലീസിലാണ് വേണു പരാതി നല്കിയത്. തൃശ്ശൂര് വിട്ടില്ലെങ്കില് വിവരം അറിയുമെന്നാണ് ഭീഷണിയെന്നാണ് വേണു പരാതിയില് പറയുന്നത്. പൊലീസ് ഫോണ് കോളുകള് അടക്കം പരിശോധിക്കുന്നുണ്ടെന്നാണ് വിവരം.
ഒക്ടോബര് 25നാണ് പണിയുടെ ഷൂട്ടിംഗ് ആരംഭിച്ചത്. ‘പണി’യില് ജോജു തന്നെയാണ് പ്രധാനവേഷത്തിലെത്തുന്നത്.അഭിനയയാണ് നായികയാകുന്നത്.