ക്ഷേമ പെൻഷൻ വിതരണം ഉടൻ; 900 കോടി മാറ്റിവച്ചതായി ധന മന്ത്രി

ഒരു മാസത്തെ സാമൂഹ്യസുരക്ഷ -ക്ഷേമ പെൻഷനുകൾ ഉടൻ വിതരണം ചെയ്യുമെന്ന് ധനമന്ത്രി കെ എൻ ബാലഗോപാൽ. പെൻഷൻ നേരിട്ടു ലഭിക്കുന്നവർക്ക്‌ സഹകരണ സംഘങ്ങൾ വഴിയും അല്ലാതെയുള്ളവർക്ക്‌ ബാങ്ക്‌ അക്കൗണ്ടുവഴിയുമാണ് നൽകുക. തൊള്ളായിരം കോടിയോളം രൂപയാണ്‌ ഇതിനായി മാറ്റിവയ്‌ക്കുന്നത്‌. കഴിഞ്ഞ
ഏഴര വർഷത്തിനുള്ളിൽ 57,604 കോടി രൂപ ക്ഷേമ പെൻഷൻ വിതരണം ചെയ്‌തിട്ടുണ്ട്‌. നിലവിലെ സർക്കാർ 22,250 കോടി രൂപ നൽകിയിട്ടുണ്ട്. 64 ലക്ഷം പേരാണ്‌ പെൻഷൻ ഡാറ്റാ ബേസിലുള്ളത്‌. മസ്‌റ്ററിങ്‌ ചെയ്‌തിട്ടുള്ളവർക്കെല്ലാം പെൻഷൻ അനുവദിക്കും. മറ്റുള്ളവർക്ക്‌ മസ്‌റ്റിറിങ്‌ പൂർത്തിയാക്കുന്ന മുറയ്ക്കു തന്നെ പെൻഷൻ ലഭിക്കും.